(ဃ)-မန္တလေးမူဆယ်လမ်းကိုနိုင်ငံတကာအဆင့်မီ လမ်းဖြစ်အောင်ဆောင်ရွက်ရန်အစီအစဉ်ရှိ/မရှိနှင့်စာ ချုပ်သက်တမ်းမည်မျှကျန်ရှိပြီးသက်တမ်းကုန်ဆုံးပါက ဆက်လက်ဆောင်ရွက်မည့်အစီအစဉ်ကိုသိလိုခြင်း တို့နှင့် စပ်လျဉ်းသည့် မေးခွန်း

မန္တလေးတိုင်းဒေသကြီးနှင့် ရှမ်းပြည်နယ် (မြောက်ပိုင်း) အတွင်းရှိ မန္တလေး-လားရှိုး-မူဆယ်-နမ့်ခမ်းလမ်း ၂၉၈ မိုင် ၃ ဖာလုံအား ၁၉၉၆ ခုနှစ်မှစ၍ ယခင်အေးရှားဝေါလ်ကုမ္ပဏီလီမီတက် ယခု Oriental Highway Co.,Ltd သို့ B.O.T စနစ်ဖြင်‌့ ဆောင်ရွက်ခွင့်ပြုခဲ့ပါကြောင်း၊ မန္တလေး-လားရှိုး-မူဆယ်လမ်းတွင် ဂုတ်တွင်းနှင့် ရှုခင်းသာကွေ့လမ်းကျဉ်းသော နေရာများအား လမ်းချဲ့ခြင်းနှင့် လမ်းခမ်းခြင်း၊ ဂုတ်တွင်းအပိုင်းတွင် Stabilized ခင်း၍ AC လမ်းအဖြစ်ဆောင်ရွက်ခြင်း၊ ရှုခင်းသာအပိုင်းတွင် လမ်းအကျယ်ရပြီး ကွေ့နေရာများအား Stabilized ခင်း၍ AC ပြန်လည်ခင်းခြင်း၊ ၄၈ ပေအကျယ်ရရှိပြီးသော မိုင်တိုင် ၂၃၈ အောက် နမ့်ဖလွန်းရွာတွင်းမှ ရှုခင်းသာဘက်ခြမ်းသို့ Stabilized နှင့် AC ခင်းခြင်း ဆောင်ရွက်လျက်ရှိပါကြောင်း၊ အဆိုပါလမ်းအား ယာဉ်ကြောပိတ်ဆို့မှု မဖြစ်စေရေးအတွက် လမ်းပိတ်ဆို့မှုအများဆုံး ဖြစ်ပွားလေ့ရှိသော နောင်ချိုမြို့နယ်၊ ဂုတ်တွင်းလမ်းပိုင်းကြားတွင် တန် ၅၀ ကရိန်းတစ်စီးနှင့် မိုင် ၂၂၂ ကွတ်ခိုင်တိုးလ်ဂိတ်တွင် ၂၅ တန် ကရိန်းတစ်စီးတို့အား အရန်သင့်ထားရှိပါကြောင်း၊ အကယ်၍ လမ်းပိတ်ဆို့မှုဖြစ်ပွားပါကလည်း နောင်ချိုတိုးလ်ဂိတ်နှင့် ကျောက်မဲတိုးလ်ဂိတ်တို့တွင် Information Center အဖြစ် LED ဆိုင်းဘုတ်များ တပ်ဆင်၍ ခရီးသွားပြည်သူများအား အချိန်မီအသိပေးနိုင်ရေး ဆောင်ရွက်ထားရှိပြီး ဖြစ်သည့်အပြင် ဆောက်လုပ်ရေးဝန်ကြီးဌာန၊ မြန်မာနိုင်ငံရဲတပ်ဖွဲ့၊ ယာဉ်ထိန်းရဲတပ်ဖွဲ့၊ Oriental Highway Co.,Ltd မှ ဝန်ထမ်းများပါဝင်သော ပူးပေါင်းအဖွဲ့များမှ ယာဉ်ကြောပိတ်ဆို့ပါက အချိန်နှင့်တပြေးညီ ရှင်းလင်းဆောင်ရွက် ပေးလျက်ရှိပါကြောင်း၊ အဆိုပါပြည်ထောင်စုလမ်းမကြီး ၂၉၈ မိုင် ၃ ဖာလုံကို AASHTO HS20-44 ဒီဇိုင်းဖြင်‌့ လေးလမ်းသွားနိုင်ကတ္တရာ လမ်းအဖြစ် အဆင့်မြှင့်တင်ဆောင်ရွက်သွားရန်အတွက် မြို့တွင်းလမ်းပိုင်း ၇၃ မိုင် ၁ ဖာလုံကို ချန်လှပ်ပြီး ကျန်ရှိသည့် ၂၂၅ မိုင် ၂ ဖာလုံကို ဆောက်လုပ်ရေးဝန်ကြီးဌာန၏ ကြီးကြပ်မှုဖြင့် Oriental Highway Co.,Ltd မှ ၂၀၁၈-၁၉ ဘဏ္ဍာရေးနှစ်တွင် ရာနှုန်းပြည့်ပြီးစီးရေး စီမံချက်ရေးဆွဲထားပြီး ဆောင်ရွက်လျက်ရှိပါကြောင်း၊ ၂၀၁၆-၁၇ ဘဏ္ဍာရေးနှစ်အထိ ၂၇ မိုင်အား လေးလမ်းသွားကတ္တရာလမ်း ဆောင်ရွက်ပြီးစီးပြီး ဖြစ်ပါကြောင်း၊ ၂၀၁၇-၁၈ ဘဏ္ဍာနှစ်တွင် ၁၁၂ မိုင် ၃ ဖာလုံနှင့် ၂၀၁၈-၁၉ ဘဏ္ဍာနှစ်တွင် ၈၅ မိုင် ၇ ဖာလုံဆောင်ရွက်ရန် စီမံချက်များရေးဆွဲထားပြီး နယ်မြေလုံခြုံရေးအခြေအနေပေါ် မူတည်ပြီး ဆောင်ရွက်သွားမည် ဖြစ်ပါကြောင်း၊ ထို့အပြင် ဂုတ်တွင်းတံတားဆောက်လုပ်ရန်နှင့် နောင်ချို မြို့ရှောင်လမ်းအား ‌ဖောက်လုပ်ရန်အတွက် မြေယာလျော်ကြေး/သီးနှံလျော်ကြေး ကိစ္စများအား ရှမ်းပြည်နယ်အစိုးရအဖွဲ့၊ သယံဇာတနှင့်သစ်တောရေးရာ ဝန်ကြီးဌာန၊ ပုဂ္ဂလိကပိုင်မြေပိုင်ရှင်များနှင့် ညှိနှိုင်းဆောင်ရွက်လျက်ရှိပါကြောင်း၊ အဆိုပါမြေယာ လျော်ကြေးညှိနှိုင်းချက်များ ပြီးစီးပါက ဂုတ်တွင်းတံတား စီမံကိန်းနှင့်နောင်ချိုမြို့ရှောင်လမ်း ဖောက်လုပ်ခြင်းလုပ်ငန်းအား အမြန်စတင် အကောင်အထည်ဖော်နိုင်မည် ဖြစ်ပါကြောင်း၊ မန္တလေး-လားရှိုး-မူဆယ်-နမ့်ခမ်းလမ်းတွင် လမ်းပိုင်းအလိုက် စာချုပ်သက်တမ်းမှာ ၄၀ နှစ်ဖြစ်ပြီး စာချုပ်သက်တမ်းကျန်ရှိနေမှု အခြေအနေအား လမ်းပိုင်းအလိုက် တင်ပြရမည်ဆိုလျှင် မန္တလေး-နောင်ချို အပိုင်း၏ B.O.T ကျန်ရှိသက်တမ်းမှာ ၂၈ နှစ်ဖြစ်ပြီး၊ နောင်ချို-ကျောက်မဲ အပိုင်း၏ B.O.Tကျန်ရှိသက်တမ်းမှာ ၂၁ နှစ်ဖြစ်ပါကြောင်း၊ ကျောက်မဲ-လားရှိုးအပိုင်း၏ လက်ကျန်သက်တမ်းက ၂၉ နှစ်ဖြစ်ပြီး လားရှိုး-မူဆယ် အပိုင်း၏ လက်ကျန်သက်တမ်းက ၂၀ နှစ်ဖြစ်ပါကြောင်း၊ မိုင်းယု-မူဆယ်အပိုင်းက ၂၆ နှစ် လက်ကျန်ဖြစ်ပြီး မူဆယ်-နမ့်ခမ်းအပိုင်း၏ B.O.T ကျန်ရှိသက်တမ်းက ၂၆ နှစ်ဖြစ်ပါကြောင်း၊ စာချုပ်သက်တမ်းကုန်ဆုံး၍ ထပ်မံတိုးမြှင့်လိုပါက တစ်ကြိမ်လျှင်ငါးနှစ်စီဖြင့် သုံးကြိမ်တိုးမြှင့်နိုင်ပါကြောင်း၊ ထိုသို့ တိုးမြှင့်ဆောင်ရွက်နိုင်ရေးအတွက် ကုမ္ပဏီအနေဖြင့် ဆောက်လုပ်ရေးဝန်ကြီးဌာနမှ စိစစ်ပြီး မြန်မာနိုင်ငံ ရင်းနှီးမြှုပ်နှံမှုကော်မရှင်သို့ တင်ပြ၍ မြန်မာနိုင်ငံရင်းနှီးမြှုပ်နှံမှု ကော်မရှင်၏ ဥပဒေအရခွင့်ပြုပါက တိုးမြှင့်ဆောင်ရွက် နိုင်ပါကြောင်း၊ သို့ဖြစ်ပါ၍ B.O.T စနစ်ဖြင့် ဆောင်ရွက်ခွင့်ပြုထားသော မန္တလေး-လားရှိုး-မူဆယ်-နမ့်ခမ်း လမ်းအား ပဋိဉာဉ်စာချုပ်သက်တမ်း ကျန်ရှိမှုနှင့် ဆောင်ရွက်မည့်အစီအစဉ် အခြေအနေအား ရှင်းလင်းဖြေကြားပါသည်။