မေးခွန်း အကြောင်းအရာ
ရေနံချောင်းမြို့သည် လျှပ်စစ်နှင့်စွမ်းအင် ဝန်ကြီးဌာန လက်အောက်ရှိ ရေနံနှင့် သဘာဝဓာတ်ငွေ့ လုပ်ငန်းနှင့် စက်မှုဝန်ကြီးဌာန လက်အောက်ရှိ စက်မှုဇုန် တည်ရှိနေသော မြို့တစ်မြို့ ဖြစ်ပါကြောင်း၊ ရေနံချောင်းမြို့ သဘာဝဓာတ်ငွေ့လုပ်ငန်းတွင် ယခုလက်ရှိ ထုတ်လုပ်နေသော ရေနံတွင်းပေါင်း ၁၇၅ တွင်းရှိပြီး ၎င်းရေနံတွင်းများမှ တစ်နေ့လျှင် ရေနံစည် ပီပါပေါင်း ၁၅၀၀ ကျော် ထုတ်လုပ်လျက်ရှိပြီး စက်မှုဇုန်မှ ဆီစက်လုပ်ငန်း၊ တွင်ခုံလုပ်ငန်း၊ ကားဝက်ရှော့ လုပ်ငန်း၊ ကားဘော်ဒီလုပ်ငန်း၊ သံရည်ကျိုလုပ်ငန်း၊ သံနန်းဆွဲလုပ်ငန်း၊ ဆိုင်ကယ် ထုတ်လုပ်ရေး လုပ်ငန်း၊ ကားထုတ်လုပ်ရေး လုပ်ငန်း၊ ပလတ်စတစ် လုပ်ငန်း၊ ကော်ဖီမှုန့် ထုတ်လုပ်ရေး လုပ်ငန်း၊ စက္ကူလုပ်ငန်း၊ သောက်ရေသန့်လုပ်ငန်း၊ အောက်ဆီဂျင် လုပ်ငန်း အပါအဝင် လုပ်ငန်းပေါင်း ၁၁၂ ခု ရှိပါကြောင်း၊
ရေနံချောင်းမြို့တွင် ရေနံနှင့် သဘာဝဓာတ်ငွေ့ လုပ်ငန်းများ ထုတ်လုပ်မှု များပြားစွာ ရှိနေသော်လည်း အသုံးပြုနေသည့် လျှပ်စစ်ဓာတ်အား ပြည့်ဝစွာ အသုံးပြုခွင့် မရသည်မှာ ရေနံချောင်းမြို့အား မကွေးမြို့မှ သွယ်တန်းထားသော မကြီးကန် 33 KV ဓာတ်အားလိုင်းမှ ရေနံချောင်း၊ လက်မှတ်ကုန်ခွဲရုံအဝင် လိုင်းတွင် 28 KV ရောက်ရှိခြင်းကြောင့် လည်းကောင်း၊ လျှပ်စစ်ဓာတ်အား ပြည့်ဝခြင်း မရှိခြင်းကြောင့် လည်းကောင်း၊ 33 KV လက်မှတ်ကုန်း၊ ဓားကုန်း ဓာတ်အားခွဲရုံများလည်း 11 KV ဓာတ်အားလိုင်း ၁၁၀၀၀ ဗို့ထွက်ရမည် ဖြစ်သော်လည်း ၉၀၀၀ ဗို့သာထွက်ရှိပြီး ၁၁၁၀.၄ ထရန်စဖော်မာများတွင်လည်း ၄၀၀ ဗို့ထွက်ရှိမည့်အစား ၃၀၄ ဗို့အားသာ ထွက်ရှိနေပါကြောင်း၊ ရေနံချောင်း စက်မှုဇုန်နှင့် မြို့ပေါ် သုံးစွဲနေသော ထရန်စဖော်မာ စုစုပေါင်းမှာ ၄၇ လုံးရှိပြီး ကျေးရွာပေါင်း ၁၄၆ ရွာရှိသည့်အနက် ၄ ရွာသာမီးလင်းပြီး ကျန်သည့် ၁၄၂ ရွာ မှာ မီးလင်းရန် ကျန်ရှိနေပါကြောင်း၊ ၎င်းတို့ ဖြစ်နေရခြင်းကြောင့် ရေနံချောင်းမြို့ လျှပ်စစ်ဗို့အား အပြည့်အဝ ရရှိနိုင်ရေးအတွက် ၃၀.၇၇ မိုင်ဝေးကွာသည့် 33 KV ဓာတ်အားလိုင်း ပြန်လည် တည်ဆောက်မည့် အစား ၂၇ မိုင်သာဝေးကွာသည့် ဂွေးချို 66 KV ဓာတ်အားလိုင်းမှဖြစ်စေ၊ 132 KV ချောက်ဓာတ်အားခွဲရုံမှ ချောက်၊ စလေ၊ ရေနံချောင်း လမ်းသစ်အတိုင်း အစားထိုး တပ်ဆင်နိုင်ရန်နှင့် ယခုလက်ရှိ အသုံးပြုနေသော ၃၀.၇၇ မိုင်ဝေးကွာသည့် မကွေး၊ ရေနံချောင်း 33 KV ဓာတ်အားလိုင်း၏ အားနည်းချက်များကြောင့် မိုးရာသီဆိုလျှင် လေတိုက်၍ဖြစ်စေ၊ မိုးရွာ၍ဖြစ်စေ၊ မိုးကြိုးပစ်၍ဖြစ်စေ၊ Die folk ဖြစ်ပြီး မီးမကြာခဏ ပျက်နေခြင်းကြောင့် ရေနံနှင့် သဘာဝ ဓာတ်ငွေ့လုပ်ငန်းမှ ရေနံတွင်းများ ရပ်တန့်၍ မရသောကြောင့် Gas Carbine စက်နှစ်လုံး လဲလှယ် အသုံးပြုရပါကြောင်း၊ ၎င်းတို့လဲလှယ်ရသည့်အတွက် ရေနံတွင်းပေါင်း ၁၂၇ တွင်း လည်ပတ်ရန်အတွက် တစ်နာရီကို ထုတ်လုပ်ရသော လျှပ်စစ်ဗို့အားမှာ ၁.၆ မဂ္ဂါဝပ် ရရှိရန်အတွက် ဒီဇယ်ဂါလန် ၂၆၀ ဂါလန် ကုန်ကျသည့်အတွက် လျှပ်စစ်ဓာတ်အား ပြည့်ဝစေရန် 66 KV ဓာတ်အားလိုင်းနှင့် 66 KV ဓာတ်အားခွဲရုံ တည်ဆောက်ပေးရန် အစီအစဉ်ရှိ/မရှိ သိရှိလိုပါကြောင်း မေးမြန်းပါသည်။
ရေနံချောင်းမြို့နယ်အား လျှပ်စစ်ဓာတ်အား သုံးစွဲနိုင်ရေးအတွက် 132 KV မကြီးကန်ပင်မဓာတ်အားခွဲရုံမှ ရေနံချောင်းမြို့သို့ 33 KV ဓာတ်အားလိုင်း ၃၀.၇၇ မိုင်ဖြင့် ဓာတ်အား ချိတ်ဆက်ရယူ၍ ရေနံချောင်းမြို့တွင် 33/11 KV 5 MVA ဓာတ်အားခွဲရုံ တစ်ရုံတည်ဆောက်ပြီး ဓာတ်အား ရယူသုံးစွဲလျက် ရှိပါကြောင်း၊ အဆိုပါ လက်ရှိ 33 KV ဓာတ်အားလိုင်းကြိုးမှာ ရှေးယခင်က တည်ဆောက်ခဲ့ပြီး ဓာတ်အားလိုင်း၏ ကြိုးအရွယ်အစားမှာ ACSR 70 mm2 ဖြင့် တည်ဆောက်ထားခြင်း ဖြစ်ပါကြောင်း၊ အဆိုပါ ဓာတ်အားလိုင်းကြိုးသည် နိုင်နင်းမှုအား နည်းလာခြင်း ဖြစ်သည့်အတွက် ရေနံချောင်း ဓာတ်အားခွဲရုံမှ လျှပ်စစ်ဓာတ်အား ဖြန့်ဖြူးပေးရာတွင် ဗို့အားပိုမို ကောင်းမွန်လာရေးနှင့် ဝန်အားနိုင်နင်းစွာ ဓာတ်အား ဖြန့်ဖြူးပေးနိုင်ရန် နည်းပညာအရ 33 KV ဓာတ်အားလိုင်း၏ ကြိုးအား ပိုမိုကြီးသည့် ကြိုးဆိုဒ်ဖြင့် လဲလှယ်ရန် လိုအပ်လာခြင်းဖြစ်ပါကြောင်း၊ ဓာတ်အား ခွဲရုံတွင်ရှိသော လက်ရှိ တပ်ဆင်ထားသည့် 33/11 KV 5 MVA ထရန်စဖော်မာ၏ ဝန်အားသည် ၈၃ ရာခိုင်နှုန်း အထိ ရောက်ရှိလာခြင်း ဖြစ်ပါကြောင်း၊ ထို့ကြောင့် ဓာတ်အားခွဲရုံတွင် သင့်လျော်သည့် ထရန်စဖော်မာ တစ်လုံးကိုလည်း တိုးချဲ့တပ်ဆင်သွားရန် လိုအပ်ပါကြောင်း၊ ရေနံချောင်း ဓာတ်အားခွဲရုံတွင် 33/11 KV 10M VA ထရန်စဖော်မာတစ်လုံး ထပ်မံတိုးချဲ့တည်ဆောက်ခြင်းလုပ်ငန်းအတွက် လိုအပ်သည့် ရန်ပုံငွေ ၈၂၁.၀၉ ကျပ်သန်းကို ၂၀၁၇-၁၈ ဘဏ္ဍာရေးနှစ်တွင် အာရှဖွံ့ဖြိုးရေး ဘဏ်ချေးငွေဖြင့် ဆောင်ရွက်ရန်လျာထား စီစဉ်ထားရှိပြီး ဖြစ်ပါကြောင်း၊ လက်ရှိ မကြီးကန်၊ ရေနံချောင်း 33/11 KV ဓာတ်အားလိုင်းတွင်ရှိသည့် 70 mm2 ဓာတ်အားလိုင်းကြိုးကိုလည်း 150 mm2 ကြိုးဖြင့် အစားထိုး လဲလှယ်ခြင်း လုပ်ငန်းများဆောင်ရွက်ရန် လိုအပ်သည့် ရန်ပုံငွေ ၇၇၂.၅၇၃ ကျပ်သန်းကို လည်း ၂၀၁၈-၁၉ ဘဏ္ဍာရေးနှစ်တွင် ထည့်သွင်းတင်ပြ တောင်းခံသွားမည်ဖြစ်ပြီး ရရှိပါက ထိုလုပ်ငန်းကိုလည်း ဆောင်ရွက်သွားနိုင်မည်ဆိုပါက ရေနံချောင်းမြို့အတွက် ဗို့အားပိုမိုကောင်းမွန်ခြင်းနှင့် လက်ရှိဓာတ်အား အခြေအနေထက် ပိုမိုတိုးတက် သုံးစွဲလာနိုင်မည် ဖြစ်ပါကြောင်း၊ ထို့အပြင် ဝန်ကြီးဌာနက ရေနံချောင်းမြို့တွင် 66 KV ဓာတ်အားခွဲရုံတစ်ရုံ တည်ဆောက်ပြီး ဓာတ်အားဖြန့်ဖြူးနိုင်ရန် ချောက်မြို့နယ်တွင်ရှိသည့် 132 KV ချောက်ဓာတ်အားခွဲရုံမှ ရေနံချောင်းမြို့သို့ 66 KV ဓာတ်အားလိုင်း ၃၇ မိုင်တည်ဆောက်ခြင်း၊ ရေနံချောင်းမြို့ရှိ စက်မှုဇုန်အနီးတွင် 66/33 KV 15 MVA 15 MVA ဓာတ် အားခွဲရုံတည်ဆောက်ခြင်းနှင့် အဆိုပါ 66 KV စက်မှုဇုန်ဓာတ်အားခွဲရုံမှ 33 KV ရေနံချောင်း ဓာတ်အားခွဲရုံသို့ 33 KV ဓာတ်အားလိုင်း ၃ မိုင် ပြန်လည်ချိတ်ဆက် တည်ဆောက်လိုက်ပါက တိုးတက်ကောင်းမွန် သွားမည်ဖြစ်သဖြင့် ဝန်ကြီးဌာနက ၂၀၁၇-၁၈ ခုနှစ်မှ ၂၀၂၁-၂၂ ခုနှစ်အထိ ၅ နှစ်တာ ကာလအတွင်း ဆောင်ရွက်မည့် စီမံချက်များတွင် ထည့်သွင်းရေးဆွဲ ဆောင်ရွက် ထားပါကြောင်းနှင့် စီမံချက်အရ ၂၀၂၁-၂၂ ဘဏ္ဍာရေးနှစ်များတွင် အကောင်အထည်ဖော် ဆောင်ရွက်သွားမည် ဖြစ်ပါကြောင်း ရှင်းလင်းဖြေကြားပါသည်။