မေးခွန်း အကြောင်းအရာ
လေရှီးမြို့နယ်သည် ဆင်းရဲသော ဒေသဖြစ်သည့်အတွက် ဒေသခံပြည်သူများမှာ လှေကားထစ် လယ်ယာနှင့် ရွှေ့ပြောင်း တောင်ယာစနစ်အဖြစ်သာ အသက်မွေးဝမ်းကျောင်း ပြုနေရသည့်အတွက် နှစ်စဉ်သစ်တောများ ပြုန်းတီးနေရခြင်း၊ မီးဖိုချောင်သုံး ချက်ပြုတ်ရေးနှင့် ညဘက် အလင်းရောင် ရရှိရေးအတွက်ပါ ထင်ရှူးနှင့် အခြားသစ်ဝါးများကိုသာ အသုံးပြုနေရခြင်းတို့ကြောင့် တစ်နှစ်ထက် တစ်နှစ် သစ်တောများ ပိုမိုပြုန်းတီးလာကာ ရာသီဥတုပြောင်းလဲမှုကို သိသိသာသာ ခံစားနေကြရပြီဖြစ်ပါကြောင်း၊ ဆက်လက်၍ ယခုကဲ့သို့ ထင်းမီးကိုသာ မှီခိုနေရမည်ဆိုပါက သစ်တောပြုန်းတီးမှု ပိုမို ဆိုးရွားလာမည်ဖြစ်ပြီး ထင်းခွေရန်ပင် ခက်ခဲလာမည်ဖြစ်ပါကြောင်း၊ လေရှီးတစ်မြို့နယ်လုံးတွင် မြို့ပေါ်၌ အိမ်ခြေ ၂၀ ခန့် ရှိသည့် ရွာလေးတစ်ရွာသာ လျှပ်စစ်မီးရရှိပြီး ကျန်ကျေးရွာအားလုံး လျှပ်စစ်မီး လုံးဝမရှိသေးပါကြောင်း၊ ထို့ကြောင့် အနာဂတ်လူ့အရင်းအမြစ်ဖြစ်သော ကျောင်းသားကျောင်းသူများ၏ ပညာရေးအတွက်လည်း အရေးတကြီး လိုအပ်နေပါကြောင်း၊
နန်ဝန်ချောင်းရေအား လျှပ်စစ်ထုတ်လုပ်မည့် နေရာတွင် ဒေသခံများနှင့် ဌာနဆိုင်ရာများ ကွင်းဆင်းပြီး ရေထုတ်မည့်နေရာကို ဦးစားပေး(၁) နှင့်သာ လျာထားရမည်ဖြစ်ပါကြောင်း၊ ရေအားလျှပ်စစ် ထုတ်မည်ဆိုပါက လေရှီးမြို့နယ်၏ လူဦးရေ အထူထပ်ဆုံး နေရာဖြစ်သည့်အတွက် မြို့နယ်လူဦးရေ၏ ၆၀ ရာခိုင်နှုန်းခန့်သည် လျှပ်စစ်မီးရရှိမည် ဖြစ်ပါကြောင်း၊
နန်းသလက်ချောင်း တည်နေရာကို ကွင်းဆင်းထားခြင်း မရှိသေးသော်လည်း ထုတ်လုပ်၍ရသည့် အခြေအနေ ရှိပါကြောင်း၊ ကျွမ်းကျင်ပညာရှင်များနှင့် ကွင်းဆင်းရွေးချယ် မည်ဆိုပါက အကောင်းဆုံး ဖြစ်ပါကြောင်း၊ ၎င်းချောင်းတွင် ထုတ်မည်ဆိုပါက စစ်ကိုင်းတိုင်းဒေသကြီး အထက်ပိုင်း မြို့နယ်အားလုံး နီးပါး ဖြန့်ဖြူးပေးနိုင်သည့် မဂ္ဂါဝပ်ရရှိနိုင်သည့် ရေပမာဏရှိနေပါကြောင်း၊
အခြားအရပ်ဒေသများတွင် ရေကာတာတစ်ခု တည်ဆောက်မည်ဆိုပါက လယ်ယာမြေ၊ ဥယျာဉ်ခြံနှင့် သစ်တောများ ရေမြုပ်ပြီး သဘာဝပတ်ဝန်းကျင်ကို များစွာထိခိုက်သည့်အတွက် ကန့်ကွက်သည့် အသံများ ဦးစွာကြားရလေ့ရှိပါကြောင်း၊ လေရှီးမြို့နယ်ရှိ ကျေးရွာများ လျှပ်စစ်မီးရရှိရေးအတွက် နန်ဝန်ချောင်းနှင့် နန်းသလက်ချောင်းများတွင် အသေးစားနှင့် အလတ်စား ရေအားလျှပ်စစ်ဓာတ်အား ထုတ်လုပ်ပေးရန် အစီအစဉ် ရှိ/မရှိ သိရှိလိုပါကြောင်း မေးမြန်းပါသည်။
လေရှီးမြို့နယ်အတွင်းရှိ နန်ဝန်ချောင်းနှင့် နန်းသလက်ချောင်းများမှ ရေအား လျှပ်စစ်ဓာတ်အား ထုတ်ယူရန် ကနဦး ကွင်းဆင်း စူးစမ်းလေ့လာမှုများ ပြုလုပ်ရန် လိုအပ်ပါကြောင်း၊ အဆိုပါ စူးစမ်းလေ့လာ တိုင်းတာမှုများမှ ရရှိသော ရလဒ်များအပေါ် မူတည်ကာ စီမံကိန်းကို အကောင်အထည်ဖော် ဆောင်ရွက်ရမည် ဖြစ်ပါကြောင်း၊ နန်ဝန်ချောင်းနှင့် နန်းသလက်ချောင်းများမှ ရေအားလျှပ်စစ် ထုတ်ယူရန်အတွက် ယခင်က စူးစမ်းလေ့လာ တိုင်းတာထားသော အချက်အလက်များ မရှိသေးပါကြောင်း၊ လေရှီးမြို့နယ်အတွင်းရှိ ကျေးရွာများ လျှပ်စစ်မီးရရှိရန် နန်ဝန်ချောင်းနှင့် နန်းသလက်ချောင်းမှ အသေးစား သို့မဟုတ် အလတ်စား ရေအားလျှပ်စစ် ထုတ်ယူမည်ဆိုပါက ဖွဲ့စည်းပုံအခြေခံဥပဒေ (၂၀၀၈ ခုနှစ်) ပုဒ်မ ၁၈၈ ဇယား ၂ အပိုဒ် ၄ အပိုဒ်ခွဲ (က)နှင့် လျှပ်စစ်ဥပဒေ (၂၀၁၄ ခုနှစ်) ပုဒ်မ ၁၃ တို့အရ မဟာဓာတ်အားလိုင်းနှင့် ဆက်သွယ်ခြင်း မရှိသော အသေးစားနှင့် အလတ်စား လျှပ်စစ်ဓာတ်အား ထုတ်လုပ်ခြင်းနှင့် ဖြန့်ဖြူးခြင်း လုပ်ငန်းများအား တိုင်းဒေသကြီး သို့မဟုတ် ပြည်နယ်က စီမံခန့်ခွဲခွင့် ရှိပါကြောင်းနှင့် ပြည်တွင်းပြည်ပမှ ရင်းနှီးမြှုပ်နှံဆောင်ရွက်လိုသည့် မည်သည့်ပုဂ္ဂိုလ်၊ အဖွဲ့အစည်းကိုမဆို တည်ဆဲဥပဒေများနှင့်အညီ ခွင့်ပြုမိန့် ထုတ်ပေးနိုင်ကြောင်း ဖော်ပြထားပါသဖြင့် နန်ဝန်ချောင်းနှင့် နန်းသလက်ချောင်းမှ အသေးစား သို့မဟုတ် အလတ်စား ရေအားလျှပ်စစ် ထုတ်ယူရေးအတွက် သက်ဆိုင်ရာ စစ်ကိုင်းတိုင်း ဒေသကြီးအစိုးရအဖွဲ့၏ စီမံခန့်ခွဲမှုဖြင့် စူးစမ်းတိုင်းတာမှုလုပ်ငန်းများ ဆက်လက်ဆောင်ရွက်သွားနိုင်ရေးကို မိမိတို့ဝန်ကြီးဌာနက ညှိနှိုင်းဆောင်ရွက်သွားမည်ဖြစ်ပြီး လိုအပ်ပါက မိမိတို့ဝန်ကြီးဌာန အနေဖြင့် နည်းပညာဆိုင်ရာ အကူအညီများ ပံ့ပိုးကူညီဆောင်ရွက်ကာ အင်ဂျင်နီယာများအား လုပ်ငန်းခွင်သို့ စူးစမ်းလေ့လာ တိုင်းတာခြင်းလုပ်ငန်းများ ပူးပေါင်းဆောင်ရွက် ပေးသွားမည် ဖြစ်ပါကြောင်း ရှင်းလင်းဖြေကြားပါသည်။