(ဃ)-မိုးမောက်မြို့နယ်၊ ဒေါ့ဖုန်းယန်မြို့၊ နားလုံ အ.ထ.ကခွဲကျောင်းအားပြီးဆုံးအောင်ဆောက်လုပ် ပေးရန် နှင့် အထက်တန်းပြဆရာမ ထပ်မံခန့်အပ် ပေးရန် အစီအစဉ်ရှိ၊ မရှိ တို့နှင့် စပ်လျဉ်းသည့် မေးခွန်း

ကချင်ပြည်နယ်၊ မိုးမောက်မြို့နယ်အတွက် ၂၀၁၇-၁၈ ဘဏ္ဍာရေးနှစ်တွင် ငွေလုံးငွေရင်းရန်ပုံငွေဖြင့် ကျောင်းဆောင်ဆောက်လုပ်ခြင်း လုပ်ငန်းများဆောက်လုပ်ရန် ယခုနှစ်ဘတ်ဂျက်တွင် ငွေကျပ် ၂၂၇ သန်း ခွဲဝေဆောင်ရွက်ပေးပြီး ဖြစ်ပါကြောင်း၊ ကချင်ပြည်နယ်၊ မိုးမောက်မြို့နယ်၊ နားလုံကျေးရွာ အခြေခံပညာ အထက်တန်းကျောင်းခွဲတွင် ဆောင် (၁၅၀ ပေx၃၀ ပေ)၊ သွပ်မိုးအုတ်ညှပ် တစ်ထပ်ဆောင်၊ မုံလိုင်ဆောင် (၁၂၀ x ၃၀ ပေ) သွပ်မိုးအုတ်ညှပ် တစ်ထပ်ဆောင်နှင့် အပြီးသတ်နိုင်မှုမရှိသေးသည့် (၁၇၀ x ၃၀ ပေ) သွပ်မိုးအုတ်ညှပ်နှစ်ထပ်ဆောင် အပါအဝင် စာသင်ဆောင် သုံးဆောင်ရှိပြီး စာသင်ခန်းဧရိယာစုစုပေါင်း ၆၄၈၀ စတုရန်းပေရှိပါကြောင်း၊ တင်ပြပါကျောင်းမှာ ကျောင်းသား/သူများအနေဖြင့် ၂၀၁၆-၁၇ ပညာသင်နှစ်စာရင်းအရ မူဆင့်တွင် ၈၇ ဦး၊ လယ်ဆင့်တွင် ၁၀၃ ဦး၊ အထက်တန်းဆင့်တွင် ကိုးဦး စုစုပေါင်း ၁၉၉ ဦးရှိပါကြောင်း၊ ၎င်း ၁၉၉ ဦးအတွက် စာသင်ဧရိယာသည် ၃၆၀၀ စတုရန်းပေ ရရှိလျှင်လုံလောက်ပါသဖြင့် စာသင်ခန်း ဧရိယာနှင့် ကျောင်းသား/သူအချိုး မျှတစွာရှိပါကြောင်း၊ တင်ပြပါအပြီး သတ်နိုင်မှုမရှိသေးသော (၁၇၀x ၃၀ ပေ) သွပ်မိုးအုတ်ညှပ် နှစ်ထပ်ဆောင်ကို ၂၀၀၇-၀၈ ဘဏ္ဍာရေးနှစ်တွင် ငွေကျပ် ၃.၅၇ သန်းဖြင့် စတင်ဆောက်လုပ်ခဲ့ပြီး ၂၀၁၁-၁၂ ဘဏ္ဍာရေးနှစ်တွင် အပြီးသတ် လုပ်ငန်းများ ဆောင်ရွက်ရန်အတွက် ငွေကျပ်သန်းပေါင်း ၈.၁၀ သန်းထပ်မံခွဲဝေ ဆောင်ရွက်ခဲ့ပါကြောင်း၊ သို့သော် အဆိုပါဒေသတွင် နယ်မြေအေးချမ်းတည်ငြိမ် မှုမရရှိနိုင်သည့်အတွက် အဆောက်အဦတစ်ခုလုံးကို ပြီးစီးအောင် မဆောင်ရွက်နိုင်ခဲ့ပါကြောင်း၊ ပြီးခဲ့သည့် ဧပြီ လ ၂၈ ရက်နေ့ နံနက် ၂ နာရီအချိန်တွင် လေပြင်းတိုက်ခတ်မှု ဒဏ်လည်းခံခဲ့ရပါကြောင်း၊ ကိုယ်စားလှယ်ကြီး တင်ပြသည့်အတိုင်း ကချင်ပြည်နယ် ပညာရေးမှူးအနေဖြင့် ထိုကျောင်းဆောင်ကို ဖျက်သိမ်းပြီး (၉၀ ပေx ၃၀ ပေ) သွပ်မိုးအုတ်ညှပ် တစ်ထပ်ဆောင်ဖြင့် အဆောက်အအုံ ဆောက်လုပ်မှုပုံစံ Type C အနေဖြင့် ၂၀၁၇-၁၈ ဘဏ္ဍာရေးနှစ်အတွင်းတွင် ဆောက်လုပ်ပေးနိုင်ရေးအတွက် အခြေခံပညာဦးစီးဌာနမှ ဆောင်ရွက်လျက်ရှိပါကြောင်း၊ နောက်တစ်ခုမှာ ဆရာခန့်ထားမှုနှင့် ပတ်သက်၍ တင်ပြရမည်ဆိုပါက နားလုံကျေးရွာ အခြေခံပညာအထက်တန်းကျောင်းခွဲတွင် ဆရာခန့်ထားနိုင်မှု အခြေအနေအရ ၂၀၁၆-၁၇ ပညာသင်နှစ်တွင် အထက်တန်းပြတစ်ဦး၊ အလယ်တန်းပြခုနစ်ဦးနှင့် မူလတန်းပြငါးဦး စုစုပေါင်း ၁၃ ဦးခန့်ထားပြီး ဖြစ်ပါကြောင်း၊ ထိုကျောင်းအား ၂၀၁၂-၁၃၊ ၂၀၁၃-၁၄ ပညာသင်နှစ်များတွင် နယ်မြေအေးချမ်းတည်ငြိမ်မှု အခြေအနေများကြောင့် ဖွင့်နိုင်ခဲ့ခြင်းမရှိပါကြောင်း၊ သို့အတွက် ဒေါ့ဖုန်းယန် အခြေခံပညာအထက်တန်းကျောင်းတွင် တွဲဖက်ပြီး ပညာသင်ကြားရပါကြောင်း၊ ၂၀၁၄-၁၅ ပညာသင်နှစ်တွင် ပြန်လည်ဖွင့်လှစ်ခဲ့ရာ ထိုနှစ်အလိုက် နဝမတန်းကျောင်းသား တစ်ဦး၊ ၂၀၁၆-၁၇ ပညာသင်နှစ်တွင် နဝမတန်းကျောင်းသား ၉ ဦးရှိပြီး ဒသမတန်း ပညာသင်ကြားသူ မရှိပါကြောင်း၊ ၂၀၁၆-၁၇ ပညာသင်နှစ် ကျောင်းမူလတန်းအဆင့်တွင် ကျောင်းသား/သူ ၈၇ ဦး၊ ဆရာ/မ ၅ ဦး ရှိသည့်အတွက် ကျောင်းသားဆရာအချိုး ၁း၁၇၊ အလယ်တန်းအဆင့် ကျောင်းသား/သူ ၁၀၃ ဦး၊ ၇ ဦး ရှိသည့်အတွက် ကျောင်းသားဆရာအချိုး ၁း၁၅ ရှိပါတယ်။ အထက်တန်းအဆင့်တွင် နဝမတန်းကျောင်းသား/သူ ၉ ဦးရှိပြီး အထက်တန်းပြဆရာ ၁ ဦးသာ ရှိသည့်အတွက် ကျောင်းသားဆရာအချိုး ၁း၉ ဖြစ်ပါကြောင်း၊ ၎င်း အထက်တန်းဆင့်သင် ကျောင်းသူ/သားများကို အထက်တန်းပြ ဆရာတစ်ဦးအပြင် အလယ်တန်းပြဆရာ/မများကပါ ဝိုင်းဝန်းပံ့ပိုး ကူညီသင်ကြား ပေးလျက်ရှိပါကြောင်း၊ သို့သော်လည်း အဆိုပါကျောင်း၏ အထက်တန်းပြဆရာ လိုအပ်ချက်ကို ခွဲဝေရာထူးအရ မိမိတို့ ရာနှုန်းပြည့် မခန့်ထားနိုင်သော်လည်း ဆရာခန့်ထားနိုင်မှုအခြေအနေ၊ ဘာသာ ရပ်ကိုက်ညီမှု အခြေအနေ၊ ဘဏ္ဍာငွေရရှိမှု အခြေအနေများပေါ် မူတည်ပြီး ယခု ၂၀၁၇-၁၈ နှစ် အတွင်း လိုအပ်သော ဆရာ/မများ ဖြည့်စည်းခန့်ထားမှုကို စိစစ်ဆောင်ရွက်ပေးမည် ဖြစ်ကြောင်း ရှင်းလင်းဖြေကြားပါသည်။