(ဂ)-တနင်္သာရီတိုင်း ဒေသကြီးအတွင်းရှိ အသုံးပြု ခွင့်ပေးထားသည့်မြေလွတ်၊ မြေလပ်နှင့်မြေရိုင်းများ အားမည်သည့်အချိန်တွင် မြေခွန်ကောက်ခံမည်နှင့် ကောက်ခံမည့်အစီအစဉ်များမည်သို့ဆောင်ရွက်ထား သည်ကိုသိလိုခြင်း နှင့် စပ်လျဉ်းသည့် မေးခွန်း

နိုင်ငံတော်စီးပွားဖွံ့ဖြိုးတိုးတက်ရန်အတွက် မြေလွတ်၊ မြေလပ်နှင့် မြေရိုင်းများကို အသုံးပြုပြီး စီးပွားဖြစ် စိုက်ပျိုးရေး၊ မွေးမြူရေး၊ ဓာတ်သတ္တုထုတ်လုပ်ခြင်း၊ အစိုးရမှခွင့်ပြုသည့်၊ ဥပဒေနှင့်ညီညွတ်သည့် အခြားလုပ်ငန်းများကို ဆောင်ရွက်နိုင်ရန်အတွက် မြေလွတ်၊ မြေလပ်နှင့် မြေရိုင်းများ စီမံခန့်ခွဲရေးဥပဒေကို ပြဋ္ဌာန်းခဲ့ပြီး အသုံးပြုခွင့် လုပ်ပိုင်ခွင့်များ ခွင့်ပြု ပေးလျက်ရှိပါကြောင်း၊

ချထားဆောင်ရွက်သည့်အခါ တစ်နိုင်ငံလုံး အတိုင်းအတာအားဖြင့် စုစုပေါင်း ဧရိယာဧက ၃.၈၉ သန်းခန့် ခွင့်ပြုချထားပေးခဲ့ပြီး ဖြစ်ပါကြောင်း၊ အသုံးပြုဆောင်ရွက်ထားရှိမှုမှာ ဧက ကိုးသိန်း ခန့် ရှိပြီး ဆောင်ရွက်ရန်အတွက် ဧက သုံးသန်းခန့်ကျန်ရှိ နေသေးပါကြောင်း၊ ရာခိုင်နှုန်းအားဖြင့် ၇၆.၈၆ ရာခိုင်နှုန်း ဖြစ်ပါကြောင်း၊ ထို့အတူ တနင်္သာရီတိုင်းဒေသကြီးတွင် စုစုပေါင်း ဧက ၅.၈၄ သိန်း လုပ်ပိုင်ခွင့်၊ အသုံးပြုခွင့်ပေးထားပြီးဖြစ်ပါကြောင်း၊ ပြဋ္ဌာန်းထားသည့်၂၀၁၂ ခုနှစ်၊ မြေလွတ်၊ မြေလပ်နှင့် မြေရိုင်းများ စီမံခန့်ခွဲရေးနည်းဥပဒေပုဒ်မ ၄၀ တွင်  ဗဟိုကော်မတီသည် မြေလွတ်၊ မြေလပ်နှင့် မြေရိုင်းများအသုံးပြုခြင်းမှ နိုင်ငံတော်အတွက် အခွန်ဘဏ္ဍာငွေများ ထိထိရောက်ရောက်ကောက်ခံရရှိစေရန် မြေလွတ်၊ မြေလပ်နှင့် မြေရိုင်းများ လုပ်ပိုင်ခွင့်၊ အသုံးပြုခွင့်ရရှိသူမှ ယင်းလုပ်ပိုင်ခွင့်၊ အသုံးပြုခွင့်ရရှိထားတဲ့မြေများအတွက် မြေခွန်ကို သီးနှံအမျိုးအစားအလိုက်၊ လုပ်ငန်းအမျိုးအစား အလိုက် သတ်မှတ်ထားသော မြေခွန်ကင်းလွတ် ခွင့်ကာလကုန်ဆုံးတဲ့နေ့မှစ၍ တစ်နှစ်လျှင် တစ်ကြိမ် စည်းကြပ်ကောက်ခံရန် ညွှန်ကြားရမည်ဟု ပြဋ္ဌာန်းထားရှိပြီးဖြစ်ပါကြောင်း၊

မြေလွတ်၊ မြေလပ်နှင့် မြေရိုင်းများမှ မြေခွန်တော် စည်းကြပ်ကောက်ခံနိုင်ရန်နှင့် ပတ်သက်ပြီး  ပြည်ထောင်စုရှေ့နေချုပ်ရုံးနှင့် စီမံကိန်းနှင့်ဘဏ္ဍာရေးဝန်ကြီးဌာနတို့၏ အကြံပြုချက်၊ သဘော ထား မှတ်ချက်များကို တောင်းခံရရှိပြီး ပြည်ထောင်စုအစိုးရအဖွဲ့၏ စီးပွားရေးရာ ကော်မတီအား  တင်ပြထားပြီး ဖြစ်ပါကြောင်း၊ စီးပွားရေးရာကော်မတီ၏ ဆုံးဖြတ်ချက်အရ ၂၀၁၇ ခုနှစ်၊ သြဂုတ်လ ၁၀ ရက်နေ့တွင်  ကျင်းပပြုလုပ်သည့် ပြည်ထောင်စုအစိုးရအဖွဲ့ အစည်းအဝေး အမှတ်စဉ် (၁၅/၂၀၁၇)အား  တင်ပြအတည်ပြုချက် ရရှိပြီးဖြစ်ပါကြောင်း၊

မြေခွန်ကောက်ခံရာတွင် ကောက်ခံသူအရာရှိ လိုက်နာဆောင်ရွက်ရမည့် နည်းလမ်းများကို ညွှန်ကြားချက်ထုတ်ပြန်နိုင်ရန် မြေလွတ်၊ မြေလပ်နှင့် မြေရိုင်းများ စီမံခန့်ခွဲရေးဗဟို ကော်မတီ အဖွဲ့ဝင်များဖြစ်သည့် စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာနနှင့် အခြားဝန်ကြီးဌာန များဖြစ်သော ပြည်ထဲရေးဝန်ကြီးဌာန၊ ကာကွယ်ရေးဝန်ကြီးဌာန၊ သာသနာ ရေးနှင့် ယဉ်ကျေးမှု ဝန်ကြီးဌာန၊ သယံဇာတနှင့် သဘာဝ ပတ်ဝန်းကျင်ထိန်းသိမ်းရေးဝန်ကြီးဌာန၊ စီမံကိန်းနှင့် ဘဏ္ဍာရေးဝန်ကြီးဌာန၊ ဟိုတယ်နှင့် ခရီးသွား လာရေးဝန်ကြီးဌာနများ၏ အကြံပြုချက် များကို တောင်ခံစုစည်းရရှိထားပြီး ဖြစ်ပါကြောင်း၊ အနီးဆုံး မြေလွတ်၊ မြေလပ်နှင့် မြေရိုင်းများ စီမံခန့်ခွဲရေးဗဟိုကော်မတီ အစည်းအဝေးတွင် တင်ပြဆွေးနွေးပြီး မြေခွန်ကောက်ခံရေးဆိုင်ရာ ညွှန်ကြားချက်ကို ထုတ်ပြန် ဆောင်ရွက်သွားမည်ဖြစ်ပါကြောင်း၊ ၂၀၁၇-၂၀၁၈ ဘဏ္ဍာနှစ်အတွင်း ကောက်ခံရရှိနိုင်ရန် ဒီဇင်ဘာလအကုန်တွင် လုပ်ငန်းအား အပြီးသတ်ဆောင်ရွက်ပြီး ဇန်နဝါရီ အတွင်း လုပ်ထုံးလုပ်နည်း Process အရ ပြေစာရေးသားမှုကို ဆောင်ရွက်ရမှာ ဖြစ်ပါ ကြောင်း၊ ဆောင်ရွက်ပြီးလျှင် မတ်လအကုန်အပြီး ကောက်ခံသွား မည့်အခြေအနေများကို စီမံဆောင်ရွက် ထားပြီးဖြစ်ပါကြောင်း၊

 သို့ဖြစ်ပါ၍ တနင်္သာရီတိုင်းဒေသကြီးအတွင်းရှိ မြေလွတ်၊ မြေလပ်နှင့် မြေရိုင်းများအား အသုံးပြုခွင့်ပေးထားပြီး မြေခွန်ကောက်ခံထားမှုမရှိကြောင်း သိရသည့်အတွက် ကင်းလွတ်ခွင့် ကာလ ကုန်ဆုံးသည့် မြေလွတ်၊ မြေလပ်နှင့် မြေရိုင်းများ  လုပ်ကိုင်ခွင့်ရသူများကို  နည်းဥပဒေ ပုဒ်မ ၄၀ ပါ ပြဋ္ဌာန်းချက်နှင့်အညီ ၂၀၁၇-၂၀၁၈ ဘဏ္ဍာရေးနှစ်မကုန်မီတွင် စတင် ကောက်ခံရေး ဆောင်ရွက်လျက်ရှိပါကြောင်း ပြန်လည်ရှင်းလင်း ဖြေကြား အပ်ပါသည်။