(ဆ)-ဒလမြို့ရှိ ကျန်းမာရေးဝန်ထမ်းများ လက်ရှိနေထိုင်သော မြေနေရာအား ကျန်းမာရေး ဝန်ကြီးဌာနပိုင် မြေအဖြစ် သတ်မှတ်၍ ရန်ကုန်မြို့တော် နယ်နိမိတ်အတွင်းရှိ ကျန်းမာရေး ဝန်ထမ်းများအတွက် အထပ်မြင့်ဝန်ထမ်းအိမ်ရာများဆောက်လုပ်ပေးရန်အစီအစဉ်ရှိ/မရှိနှင့်စပ်လျဉ်းသည့်မေးခွန်း

ကျန်းမာရေးနှင့် အားကစား ဝန်ကြီးဌာနမှ ဒုတိယဝန်ကြီး ဒေါက်တာဒေါ်မြလေးစိန်မှ ဒလမြို့နယ် ကျန်းမာရေးမြေနေရာသည် ၁၉-၂-၁၉၉၀ ရက်နေ့တွင် မြို့ရွာနှင့် အိုးအိမ်ဖွံ့ဖြိုးရေးဦးစီးဌာန စီမံကိန်းမြေအဖြစ် အသုံးချရန် မြို့ရွာနှင့် အိုးအိမ်ဖွံ့ဖြိုးရေး ဦးစီးဌာန(ရန်ကုန်မြို့)အား ခွင့်ပြု၍ ပြည်ထဲရေး ဝန်ကြီးဌာန၏ ညွှန်ကြားချက်အရ ဆောက်လုပ်ရေး ဝန်ကြီးဌာနမှ ၆-၃-၁၉၉၅ ရက်နေ့တွင် လွှဲပြောင်းလက်ခံ ရယူခဲ့ခြင်းရှိသည်ကို စိစစ်တွေ့ရှိရပါကြောင်း၊ ကျန်းမာရေးနှင့် အားကစား ဝန်ကြီးဌာနသည် ဒလမြို့ ကျန်းမာရေးဝန်ထမ်း အိမ်ရာမြေအား ကျန်းမာရေးဌာနပိုင် အမည်ပေါက် ရရှိရေးအတွက် ၂၀-၈-၂၀၁၅ ရက်နေ့တွင် ဆောက်လုပ်ရေး ဝန်ကြီးဌာနသို့ လည်းကောင်း၊ ဆောက်လုပ်ရေး ဝန်ကြီးဌာနမှ ရန်ကုန်မြို့တော် စည်ပင်သာယာရေး ကော်မတီသို့ ၎င်းမြေနေရာအား ပြန်လည်လွှဲပြောင်းပေးခဲ့ခြင်း ရှိသဖြင့် ၈-၃-၂၀၁၆ ရက်နေ့တွင် ရန်ကုန်မြို့တော် စည်ပင်သာယာ‌ရေး ကော်မတီသို့ ဆက်သွယ်ညှိနှိုင်း ဆောင်ရွက်ခြင်းများ ရှိခဲ့ပါကြောင်း၊

ကျန်းမာရေးနှင့် အားကစား ဝန်ကြီးဌာနသည် ဒလမြို့ ကျန်းမာရေး ဝန်ထမ်းအိမ်ရာအား ဌာနပိုင် အမည်ပေါက် ရရှိရေးအတွက် ဆက်လက်ဆောင်ရွက်ရာတွင် ရန်ကုန် တိုင်းဒေသကြီးအစိုးရ အဖွဲ့သို့ ၁၃-၁၂-၂၀၁၉ ရက်နေ့နှင့် ၁၆-၂-၂၀၂၀ ရက်နေ့များတွင် ညှိနှိုင်းဆောင်ရွက်ခဲ့ပါကြောင်းနှင့် ဆောင်ရွက်စဉ် ကာလအတွင်း စိစစ်မှုအရ ဒလမြို့နယ်၊ ဆာပါချောင်ဒေသရှိ မြေများမှာ ယခင် ကိုလိုနီ‌ခေတ်ကပင် ရေဝင်အမည်ပေါက် ဆိပ်ကမ်းပိုင်မြေများ ဖြစ်ကြောင်း သိရှိရပါသဖြင့် ရေဝင်မြေ၊ ဆိပ်ကမ်းပိုင်မြေများ၏ အပိုင်းအခြားနှင့် ကျန်းမာရေး ဝန်ထမ်းအိမ်ရာ ဆောက်လုပ်ရန် ခွင့်ပြုခဲ့သည့် မြေအပိုင်းအခြားအား ကွဲပြားစွာ သိရှိနိုင်ရန် မြေစာရင်း၊ ‌မြေပုံ၊ မြေရာဇဝင်များအား စိစစ်ဆောင်ရွက်ခဲ့ရပါကြောင်း၊ သက်ဆိုင်ရာ ဌာနများ၏ ပံ့ပိုးကူညီစိစစ်မှုအရ ဒလမြို့နယ်၊ ဆာပါချောင်ရပ်ကွက် မြေဧရိယာ ၃၆ ဧကသည် မြန်မာ့ဆိပ်ကမ်း အာဏာပိုင်၏ ရေဝင် အမည်ပေါက်‌မြေများ ဖြစ်သော်လည်း ကျန်းမာရေး ဝန်ထမ်းအိမ်ရာများ ခွင့်ပြုဆောက်လုပ်‌ နေထိုင်လျက် ရှိခြင်းကြောင့် ပို့ဆောင်ရေးနှင့် ဆက်သွယ်ရေး ဝန်ကြီးဌာနမှ ကျန်းမာရေးနှင့် အားကစား ဝန်ကြီးဌာနသို့ လွှဲပြောင်း ပေးနိုင်ပါကြောင်း ပြန်ကြားချက်အရလည်းကောင်း၊ မြေစီမံခန့်ခွဲမှု လုပ်ငန်းများကို ရန်ကုန်မြို့တော် စည်ပင်သာယာရေး ကော်မတီမှ ဆောင်ရွက်လျက် ရှိခြင်းများ အရလည်းကောင်း၊ ယခုအခါ ကျန်းမာရေးနှင့် အားကစား ဝန်ကြီးဌာနမှ ဌာနပိုင် အမည်ပေါက် ရရှိရေးအတွက် သက်ဆိုင်ဌာနများနှင့် လုပ်ထုံးလုပ်နည်း၊ လုပ်ငန်းစဉ်များအရ ညှိနှိုင်းဆောင်ရွက်လျက်ရှိပါကြောင်း၊

ဝန်ထမ်းများ အိမ်ရာဆောက်လုပ်ခြင်း အခြေအနေကို ဆက်လက်တင်ပြမည် ဖြစ်ပါကြောင်း၊ ၂၀၁၅-၂၀၁၆ ဘဏ္ဍာရေးနှစ်တွင် ရန်ကုန်ပြည်သူ့ဆေးရုံကြီး ဝန်ထမ်းများအတွက် ရှစ်ခန်းတွဲ လေးထပ် ဝန်ထမ်းအိမ်ရာ နှစ်လုံး တည်ဆောက်ခြင်း လုပ်ငန်းအား ၁၀၀ ရာခိုင်နှုန်းပြီးစီး လွှဲပြောင်း/ လက်ခံပြီး ယခုအခါ ဝန်ထမ်းများ နေထိုင်လျက် ရှိပါကြောင်း၊ ၂၀၁၈-၂၀၁၉ ဘဏ္ဍာရေးနှစ် ရန်ကုန် ပြည်သူ့ဆေးရုံကြီးတွင် ခြောက်ခန်းတွဲ လေးထပ် ဝန်ထမ်းအိမ်ရာ ဆောက်လုပ်ခြင်း လုပ်ငန်းကို ဆောင်ရွက်ခဲ့ပြီး ယခုအခါ ၁၀၀ ရာခိုင်နှုန်း ပြီးစီး၍ လွှဲပြောင်း/လက်ခံရယူပြီး ဖြစ်ပါကြောင်း၊ ၂၀၁၈-၂၀၁၉ ဘဏ္ဍာရေးနှစ်တွင် ‌ခြောက်ခန်းတွဲ လေးထပ် ဝန်ထမ်းအိမ်ရာ ဆောက်လုပ်ခြင်း လုပ်ငန်းကို ဆက်လက်ပြီး ဆောင်ရွက်နေပါကြောင်း၊ ယခုအခါ လုပ်ငန်းတစ်ခုလုံး၏ ၅၀ ရာခိုင်နှုန်း ပြီးစီးနေပြီ ဖြစ်ပါကြောင်း၊ ၂၀၁၉-၂၀၂၀ ဘဏ္ဍာရေးနှစ်တွင် ရန်ကုန် ပြည်သူ့ဆေးရုံကြီးအတွက် ‌ခြောက်ခန်းတွဲ လေးထပ် ဝန်ထမ်းအိမ်ရာ နှစ်လုံး ဆောက်လုပ်ခြင်း လုပ်ငန်းကိုလည်း ဆက်လက် ဆောင်ရွက်လျက် ရှိနေပါကြောင်း၊ ၂၀၁၉-၂၀၂၀ ဘဏ္ဍာရေးနှစ်တွင် လေးခန်းတွဲ လေးထပ် ဝန်ထမ်းအိမ်ရာ ဆောက်လုပ်ခြင်းကိုလည်း ဆက်လက် ဆောင်ရွက်လျက်ရှိရာ ၂၅ ရာခိုင်နှုန်း ပြီးစီး နေပြီ ဖြစ်ပါကြောင်း၊ သို့ဖြစ်ပါ၍ ဒလမြို့နယ် ကျန်းမာရေး ဝန်ထမ်းအိမ်ရာ ကျန်းမာရေး ဝန်ထမ်းများ နေထိုင်ရာ ဘဏ္ဍာရေးနှစ် ခွင့်ပြုမှုအရ အထပ်မြင့် ဝန်ထမ်းအိမ်ရာ ဆောက်လုပ်လျက် ရှိပါကြောင်းနှင့် ဘဏ္ဍာငွေ ရရှိမှုအပေါ်မူတည်၍ ဖြည့်ဆည်း ဆောင်ရွက်သွားမည် ဖြစ်ပါကြောင်း ဖြေကြားပါသည်။