(င)-ဗိုလ်တထောင်မြို့နယ်မှကြည့်မြင်တိုင်မြို့နယ် အထိ ဖောက်လုပ်ထားသော ကမ်းနားလမ်းသစ် စီမံကိန်းကို မည်သည့်စနစ်ဖြင့် ဖောက်လုပ်ခဲ့ပြီး လမ်းဖြတ်သန်းခ အခွန်ငွေများကိုရသုံးမှန်းခြေငွေ စာရင်းသို့ ထည့်သွင်းခြင်း ရှိ/မရှိနှင့် စပ်လျဉ်း သည့် မေးခွန်း

ကမ်းနားလမ်းသစ် ကွန်ကရစ်လမ်းမကြီးသည် ဗိုလ်တထောင်မြို့နယ် သန်လျက်စွန်းမှ ကြည့်မြင်တိုင်မြို့နယ်၊ ဗားကရာလမ်းအထိ ၅.၀၆၉ မိုင်ရှည်လျားပါကြောင်း၊ တစ်ဖက်လျှင် ယာဉ်သွားလမ်း နှစ်လမ်းဖြစ်ပြီး ကမ်းနားလမ်းဘက် ယာဉ်သွားလမ်းတွင် မီးရထားလမ်းပါ ထည့်သွင်းဖောက်လုပ် ထားသည့်အတွက် လမ်း၏အကျယ်သည် ၅၂ ပေရှိပါကြောင်း၊ ကမ်းနားလမ်းသစ်ကို Virtue Land Co.,Ltd (ကောင်းမြတ်သောမြေကုမ္ပဏီ)မှ ကုန်ကျငွေအားလုံး စိုက်ထုတ်ဆောင်ရွက်ခဲ့ပြီး ရန်ကုန်မြို့တော် စည်ပင်သာယာရေးကော်မတီနှင့် အကျိုးတူ B.O.T စနစ်ဖြင့် ဝင်ငွေအပေါ်တွင် အောက်ပါအတိုင်း အကျိုးအမြတ်ခွဲဝေ၍ ဆောင်ရွက်ခွင့်ပြုရန် ၁၃-၂-၂၀၁၃ ရက်နေ့မှာကျင်းပသည့် မြန်မာနိုင်ငံ ရင်းနှီးမြှုပ်နှံမှု ကော်မရှင် (၇/၂၀၁၃) ကြိမ်မြောက် အစည်းအဝေးမှ ခွင့်ပြုချက်အမှတ်၊ မနသ-၈၈၈/၂၀၁၃ နှင့် ခွင့်ပြုခဲ့ပါကြောင်း၊ အကျိုးအမြတ် ခွဲဝေခြင်းနှင့် ပတ်သက်၍ ကာလအပိုင်းအခြားမှာ ပထမနှစ်တွင် ၁၅ နှစ် အထိကို ငါးရာခိုင်နှုန်း ပေးသွင်းရမည်ဖြစ်ပါကြောင်း၊ ၁၆ နှစ်မှာ နှစ် ၃၀ အထိ ရှစ်ရာခိုင်နှုန်း ပေးသွင်း ရန်ဖြစ်ပြီး ၃၁ နှစ်မှ နှစ် ၄၀ အထိကို ၁၀ ရာခိုင်နှုန်း ပေးသွင်းရမည်ဖြစ်ပါကြောင်း၊ လမ်းဖြတ်သန်းခအနေဖြင့် ၁၄ ပေနှင့် အောက်ယာဉ်တစ်စီးလျှင် ကျပ် ၁၅၀၀ နှုန်း၊ တန် ၂၀ နှင့် အထက်  ကုန်တင်ယာဉ်တစ်စင်းလျှင် ၄၀၀၀ နှုန်းနှင့် နံနက်ခြောက်နာရီမှ နောက်တစ်နေ့နံနက် ခြောက်နာရီအထိ ၂၄ နာရီ အတွင်း ယာဉ်တစ်စီးလျှင် တစ်ကြိမ်သာ ကောက်ခံပြီး ဖြတ်သန်းခွင့်ပြုခြင်းကို ၁-၄-၂၀၁၃ ရက်နေ့မှစပြီး ဆောင်ရွက်ကောက်ခံလျက် ရှိပါကြောင်း၊

အထက်ပါအကျိုးအမြတ် ခွဲဝေမှုအတိုင်း Virtue Land Co.,Ltd (ကောင်းမြတ်သောမြေကုမ္ပဏီ) မှ ကောက်ခံရရှိငွေ၏ ငါးရာခိုင်နှုန်းကို ရန်ကုန်မြို့တော် စည်ပင်သာယာရေး ကော်မတီဝင် ငွေစာရင်းသို့ ပေးသွင်းလျက်ရှိရာ ၂၀၁၃-၁၄ ဘဏ္ဍာရေးနှစ်တွင် သန်းပေါင်း ၁၄၁.၁၄၉၊ ၂၀၁၄-၁၅ ဘဏ္ဍာနှစ်တွင် သန်းပေါင်း ၁၅၂.၁၁၄ စုစုပေါင်း သန်းပေါင်း ၂၉၃.၂၆၄ ပေးသွင်းခဲ့ပြီး ဖြစ်ကြောင်း ရန်ကုန်တိုင်းဒေသကြီး အစိုးရအဖွဲ့ကိုယ်စား ရှင်းလင်းဖြေကြားပါသည်။