(စ)-အဝေးသင်သင်ကြားလိုကြသူများအတွက် အိမ်ထောင်စုစာရင်းတောင်းခံနေမှုအား ပယ်ဖျက်ပေးနိုင်ခြင်းရှိ/မရှိနှင့် တက္ကသိုလ်ဝင် အောင်မြင်ကြောင်း အထောက်အထား၊ အမှတ်စာရင်းနှင့် အုပ်ချုပ်ရေးမှူးများ၏ ထောက်ခံချက်ဖြင့် ခွင့်ပြုနိုင်ခြင်းရှိ/မရှိနှင့် စပ်လျဉ်းသည့်မေးခွန်း

ပညာရေးဝန်ကြီးဌာန အဆင့်မြှင့်ပညာဦးစီးဌာနရှိ အဝေးသင်တက္ကသိုလ်များသို့ တက် ရောက်လိုသည့် ကျောင်းသူကျောင်းသားများအား တက္ကသိုလ်ဝင်ခွင့်လက်ခံရာတွင် ၎င်းတို့ တက္ကသိုလ် ဝင်တန်းစာမေးပွဲ ဖြေဆိုအောင်မြင်ခဲ့သည့် စာစစ်ဌာနများအပေါ်မူတည်ပြီး တက္ကသိုလ်အလိုက် ဝင်ခွင့်လက်ခံရန် သတ်မှတ်ထားသည့် စာစစ်ဌာနများအရ တက္ကသိုလ်ဝင် ရွေးချယ်ရေးအဖွဲ့အား ရွေးချယ်ခွင့်ပြုလျက်ရှိပါကြောင်း၊

၂၀၁၉ ခုနှစ် တက္ကသိုလ်ဝင်ခွင့်လမ်းညွှန် အခန်း(၉) အဝေးသင်သင်တန်းရေးရာ ကိစ္စရပ်များ အခန်းတွင် အဝေးသင်သင်တန်းသားတိုင်းသည် အဝေးသင်သင်တန်းတွင် ဘာသာပြောင်း လိုသည့် ကိစ္စ၊ ကျောင်းပြောင်းလိုသည့်ကိစ္စများကို မိမိတို့သင်ကြားခွင့်ရရှိသည့် တက္ကသိုလ်၏ အဝေးသင်ဌာနခွဲသို့ တိုက်ရိုက်ဆက်သွယ်ဆောင်ရွက်၍ရပါကြောင်း၊ ကျောင်းပြောင်းလျှောက်ထားရာတွင် မိမိတက်ရောက်လိုသည့် ဌာနခွဲဆိုင်ရာ‌နယ်မြေတွင် အမှန်တကယ်နေထိုင်သူဖြစ်ကြောင်း အိမ်ထောင်စုစာရင်းမိတ္တူ သို့မဟုတ် ကျောင်းသား သည် ဝန်ထမ်းဖြစ်ပါက ဝန်ထမ်းဖြစ်ကြောင်း ထောက်ခံချက် သို့မဟုတ် ကျောင်းသားမိဘ တစ်ဦးဦးသည် ဝန်ထမ်းဖြစ်ပါက ပြောင်းရွှေ့မိန့်မိတ္တူ တို့ကို ပူးတွဲတင်ပြရပါကြောင်း၊

ကျောင်းပြောင်းရွှေ့ခွင့်ပြုရေး၊ မပြုရေး၊ ဆုံးဖြတ်ရာတွင် ကျောင်းပြောင်းရွှေ့လိုသည့် ကျောင်းသားကျောင်းသူက တင်ပြလာသည့်အထက်ပါအချက်အလက်များကို ပြည့်စုံ မှန်ကန် မှု ရှိ/မရှိ ဦးစွာစစ်ဆေးပြီးမှ ပြည့်စုံမှန်ကန်မှုရှိပါက  လက်ခံမည့်တက္ကသိုလ်၏ ဆရာ ဆရာမ အင်အား၊ လက်တွေ့ခန်းနှင့် စာသင်ခန်းအင်အားတို့ကို စိစစ်ပြီး သတ်မှတ်ချက်နှင့် ကိုက်ညီမှ သာ ခွင့်ပြုပေးလျက်ရှိပါကြောင်း၊ အချက်အလက်များ တောင်းရခြင်းမှာ သွား ရောက်လို သည့် တက္ကသိုလ်တည်ရာ နယ်မြေတွင် အမှန်တကယ်နေထိုင်ခြင်း အိမ်ထောင်စုစာရင်းမိတ္တူ သို့မဟုတ် မိဘပြောင်းရွှေ့မိန့်မိတ္တူများ တောင်းခံရခြင်း၏ အဓိကရည်ရွယ်ချက်သည် ရန်ကုန်မြို့၊ မန္တလေးမြို့နှင့် အခြားမြို့ကြီးများရှိ တက္ကသိုလ်ကြီးများသို့ အခြားတက္ကသိုလ်၊ ဘာသာရပ်ဌာနခွဲများမှ ပြောင်းရွှေ့သင်ကြားလိုသူ လွန်စွာများပြားသည့်အတွက် ဝန်နှင့်အား မျှစေရန် အထောက်အထားအဖြစ် တောင်းခံခြင်းဖြစ်ပါကြောင်း၊ သို့သော် ကျောင်းပြောင်း ရွှေ့လိုသည့် အဝေးသင်ကျောင်းသားကျောင်းသူများအတွက် အမှန်တကယ် အခက်အခဲရှိ မည်ဆိုပါက အိမ်ထောင်စုစာရင်းမိတ္တူ တောင်းခံနေမှုကို ဖြေလျော့ပြီး တက္ကသိုလ်ဝင် စာမေးပွဲအောင်မြင်ကြောင်း အထောက်အထား၊ အမှတ်စာရင်း၊ အမှန် တကယ် နေထိုင်သည့် ဒေသ၊ အလုပ်အကိုင် လုပ်ကိုင်နေသည့်ဒေသများရှိ ရပ်ကွက်၊ ကျေးရွာအုပ်ချုပ်ရေးမှူးများ၏ ထောက်ခံချက်များအပေါ် မြို့နယ်အုပ်ချုပ်ရေးမှူးမှ ထပ်ဆင့်အတည်ပြု ထောက်ခံချက်ဖြင့် ကျောင်းပြောင်းရွှေ့ရေးအတွက် စိစစ်ဆောင်ရွက်နိုင်ရန် သက်ဆိုင်ရာ အဝေးသင်တက္ကသိုလ် ဌာနခွဲများနှင့်ညှိနှိုင်းပြီး လုပ်ထုံးလုပ်နည်းနှင့်အညီ ဆောင်ရွက်ပေးမည်ဖြစ်ပါကြောင်း ပြန်လည်ဖြေကြားပါသည်။