(က)-ဒိုက်ဦးမြို့နယ်တွင် ပြည်ထဲရေးအမည်မပေါက်သေးသော ကျေးရွာများအား ပြည်ထဲရေးအမည်ပေါက် ကျေးရွာအဖြစ် အမြန်ဆုံးဆောင်ရွက်ပေးရန် အစီအစဉ်ရှိ/မရှိနှင့်စပ်လျဉ်းသည်‌့မေးခွန်း

ပဲခူးတိုင်းဒေသကြီး၊ ပဲခူးခရိုင်၊ ဒိုက်ဦးမြို့နယ်အတွင်း အမည်မပေါက်သေးသော ကျေးရွာများအား ၁၂-၇-၂၀၁၈ ရက်နေ့တွင် ဒိုက်ဦးမြို့နယ် အထွေထွေအုပ်ချုပ်ရေးဦးစီးဌာနမှာ  တရားဝင်အမည်ပေါက် ကျေးရွာများဖြစ်စေရေးအတွက် ဆောင်ရွက်သွားရန် ပြည်သူ့လွှတ်တော် ကိုယ်စားလှယ် မြို့နယ်အုပ်ချုပ် ရေးမှူးနှင့် သက်ဆိုင်ရာကျေးရွာအုပ်စု ၁၄ အုပ်စုမှ အုပ်ချုပ်ရေးမှူးများနှင့် စာရေးများ၊ မြေတိုင်းစာရေး များနှင့် အစည်းအဝေးပြုလုပ်ခဲ့ပါကြောင်း၊ (က) အောက်ကညင်မြောင် သစ်တောကြိုးဝိုင်း ပယ်ဖျက်ပြီး ဧရိယာအတွင်း ကျေးရွာအသစ် ၁၁ ရွာ၊ (ခ) မြေအမျိုးအစား သတ်မှတ်ချက်အပေါ် မူတည်ပြီး သက်ဆိုင်ရာ ဝန်ကြီးဌာန၊ ကော်မတီနှင့် အဖွဲ့များ၏ မြေအသုံးပြုဆောင်ရွက်ရန် သဘောတူခွင့်ပြုချက်များ ရရှိရေး ပထမဦးစွာဆောင်ရွက်ရန် လိုအပ်သောကျေးရွာအသစ် ၁၆ ရွာ စုစုပေါင်း ကျေးရွာသစ် ၂၇ ရွာကို အမည်ပေါက်ရရှိရေး ဆောင်ရွက်သွားရန် ဆွေးနွေးဆုံးဖြတ်ခဲ့ပြီး ဖြစ်ပါကြောင်း၊

အောက်ကညင်မြောင်သစ်တော ကြိုးဝိုင်းပယ်ဖျက်ပြီး ဧရိယာအတွင်းရှိကျေးရွာ ၁၁ ရွာနှင့် ပတ်သက်၍ ကွင်းဆင်းစိစစ် ဆောင်ရွက်ချက်များအရ တင်ပြခဲ့သည့်အတိုင်း တွေ့ရှိရပါကြောင်း၊ ပထမအချက်မှာ အုတ်ရှစ်ကုန်းကျေးရွာ အုပ်စုရှိ သိုက်တူးကုန်းကျေးရွာကို ကျေးရွာအမည်ပေါက် ရရှိရေးအတွက် မြေပုံရေး ဆွဲပြီးမှ အမှုတွဲပြုစု ဆောင်ရွက်နေပြီဖြစ်ပြီး၊ ဗျက်ကြီးကျေးရွာအုပ်စုရှိ လုပ်သားကျေးရွာမှာ ယခင်က ကုမ္ပဏီစိုက်ခင်း လုပ်သားများ တဲထိုး၍ ပြန့်ကြဲနေထိုင်ခြင်း ဖြစ်သောကြောင့် ကျေးရွာအင်္ဂါရပ်နှင့် မညီသည့်အတွက် ကျေးရွာအဖြစ် ဖွဲ့စည်းရန်မသင့်ကြောင်း သဘောထားမှတ်ချက် တင်ပြထားပါကြောင်း၊ ပြန့်ကြဲတဲများဖြင့်နေထိုင်သော ဆင်ဇလုပ်ကျေးရွာ အုပ်စုအတွင်းရှိ အောင်ချမ်းသာကျေးရွာ၊ အောင်မြင်ကွင်းကျေးရွာ၊ အောင်သာယာကျေးရွာနှင့် ရွှေပြည်သာကျေးရွာ စုစုပေါင်းကျေးရွာ ၄ ရွာတို့မှာ ကျေးရွာအင်္ဂါရပ်နှင့် မညီညွတ်သည့်အတွက် ကျေးရွာအဖြစ်ဖွဲ့စည်းပေးရန် မသင့်ကြောင်းကိုလည်း တင်ပြထားပါကြောင်း၊ သပြေတန်းကျေးရွာအုပ်စု အတွင်းရှိ ရွှေဟင်္သာကျေးရွာ၊ ရွှေရောင်မြေ (၁) ကျေးရွာ၊ ရွှေရောင်မြေ (၂) ကျေးရွာ၊ ရွှေရောင်ထွန်းကျေးရွာ၊ အောင်စည်ရွာ စုစုပေါင်းကျေးရွာ ၅ ရွာတို့မှာ ကုမ္ပဏီများ ရုပ်သိမ်းသွားပြီးနောက် နေရပ်သို့မပြန်ကြဘဲ တဲစုများနှင့် ပြန့်ကြဲနေထိုင်ခြင်း ဖြစ်သဖြင့် ကျေးရွာအင်္ဂါရပ်နှင့် ညီညွတ်မှုမရှိသဖြင့် ကျေးရွာသစ်အဖြစ် ဖွဲ့စည်းရန်မသင့်ကြောင်းကိုလည်း မိမိတို့ တိုင်းဒေသကြီးမှ တင်ပြထားပါကြောင်း၊

သပြေတန်းကျေးရွာအုပ်စု မူလအမည်ပေါက်ကျေးရွာ ၉ ရွာနှင့် ဖွဲ့စည်းထားရာမှ သပြေတန်းကျေးရွာ၊ ဂွေးပင်ကူးကျေးရွာ၊ ဂွေးတောက်မြောင်ကျေးရွာနှင့် ပေါ်သစ်ကုန်းကျေးရွာ စုစုပေါင်း မူလအမည်ပေါက် ကျေးရွာ ၄ ရွာတို့စုစည်းပြီးမှ သပြေတန်းကျေးရွာအုပ်စု အဖြစ်လည်းကောင်း၊ ကျောက်တလုံးကျေးရွာ၊ ကွင်းမြောင်ကျေးရွာ၊ သင်အင်းကျေးရွာ၊ မရမ်းချောင်းကျေးရွာနှင့် တောင်သာကျေးရွာ စုစုပေါင်း မူလအမည်ပေါက် ကျေးရွာ ၅ ရွာတို့အား စုစည်းပြီးမှ ကျောက်တလုံးကျေးရွာအုပ်စု အဖြစ်လည်းကောင်း ကျေးရွာအုပ်စု ၂ အုပ်စုခွဲ၍ နယ်နိမိတ်ခွဲဝေသတ်မှတ် ဖွဲစည်းသွားရန် အမှုတွဲပြုစု ဆောင်ရွက်လျက် ရှိပါကြောင်း၊ မြေအမျိုးအစား သတ်မှတ်ချက်ပေါ် မူတည်ပြီး သက်ဆိုင်ရာဝန်ကြီးဌာန၊ ကော်မတီနှင့် အဖွဲ့များ၏ မြေအသုံးပြုဆောင်ရွက်ရန် သဘောတူခွင့်ပြုချက်လိုအပ်သည့် ကျေးရွာသသစ် ၁၆ ရွာနှင့် ပတ်သက်ပြီး ဆောင်ရွက်မှုအခြေအနေကို အောက်ပါအတိုင်းတင်ပြလိုပါကြောင်း၊

မူလရွာမြေပေါ်မှာတည်ရှိသော အေးသာယာကျေးရွာ၊ အုန်းမြင့်စုကျေးရွာ၊ နှင်းဝိအောက်ပိုင်း ကျေးရွာ၊ ကျားချောကျေးရွာ၊ ဂုံညင်းတန်းကျေးရွာ၊ ပွဲကြီးကျေးရွာ၊ အောင်စိုးမိုးကျေးရွာ၊ မအူပင်ရွာ သစ်ကျေးရွာ၊ ဉာဏ်အင်းကျေးရွာ၊ တောင်ကလေးကျေးရွာ စုစုပေါင်းကျေးရွာ ၁၀ ရွာကို တရားဝင် အမည်ပေါက်ကျေးရွာ ဖြစ်စေရေးအတွက် ကျေးရွာသစ်ဖွဲ့စည်းခြင်းဆိုင်ရာ လုပ်ထုံးလုပ်နည်း များနှင့်အညီ အမှုတွဲတည်ဆောက်ပြီး တင်ပြသွားမည် ဖြစ်ပါကြောင်း၊ လယ်ယာမြေပေါ်တွင် တည်ရှိသော အောင်သုခကျေးရွာ၊ နှင်းပုလဲကျေးရွာ၊ ဗိုင်းဒါးသစ်ကျေးရွာ စုစုပေါင်းကျေးရွာ သုံးရွာကို လယ်ယာမြေ အခြားနည်းအသုံးပြုမှု ရရှိရေးအတွက် သက်ဆိုင်ရာကျေးရွာအုပ်စု အုပ်ချုပ်ရေးမှူးများမှ ဒိုက်ဦးမြို့နယ် လယ်ယာမြေ စီမံခန့်ခွဲရေးနှင့် အကျဉ်းဦးစီးဌာနကို ၂၈-၃-၂၀၁၉ ရက်နေ့တွင် လျှောက်ထားဆောင်ရွက်ခဲ့ကြောင်း၊ လယ်ယာမြေပေါ်တွင် တည်ရှိသော ဘုရားကြီးကျေးရွာ အုပ်စုအတွင်းရှိ ဘိုတဲလေးကျေးရွာအား စက်မှုဝန်ကြီးဌာနက အသုံးပြုရန်မရှိသဖြင့် မြေအသုံးချမှု စီမံခန့်ခွဲရေးဗဟိုကော်မတီမှ ၁၁-၁၁-၂၀၁၅ ရက်နေ့ကတည်းက နိုင်ငံတော်ကို ပြန်လည်အပ်နှံ ခွင့်ပြုခဲ့ခြင်းဖြစ်ပါကြောင်း၊ ၎င်းစွန့်လွှတ်မြေကို  ဒိုက်ဦးရော်ဘာခြံ တာဝန်ခံမန်နေဂျာမှ ခရိုင်အုပ်ချုပ်ရေးမှူးထံကို လက်ရောက်လွှဲပြောင်း အပ်နှံဆောင်ရွက်ပြီးလျှင် ရွာမြေအဖြစ် အသုံးပြုခွင့်ရရှိရေး လုပ်ထုံးလုပ်နည်း များနှင့်အညီ ဆက်လက်ဆောင်ရွက် သွားမည်ဖြစ်ပါကြောင်း၊

အဆိုပါ ယာမြေပေါ်မှာတည်ရှိသော ဘုရားကြီးကျေးရွာအတွင်းရှိ ဘိုတဲလေးကျေးရွာသည် စက်မှုဝန်ကြီးဌာန နိုင်ငံပိုင်စိုက်ခင်းများအတွင်း ကျူးကျော်နေထိုင်ခြင်း ဖြစ်သဖြင့် စက်မှုဝန်ကြီး ဌာနမှ အဆိုပါမြေအား နိုင်ငံတော်သို့ပြန်လည်စွန့်လွှတ်အပ်နှံပြီးမှသာ ရွာမြေအဖြစ်လျှောက်ထား ဆောင်ရွက်နိုင်မည် ဖြစ်ပါကြောင်း၊ ထို့အပြင် ပုကန်ကွဲကျေးရွာ အုပ်စုအတွင်းရှိ အောင်သာယာ ကျေးရွာမှာ စားကျက်မြေပေါ်၌ တည်ရှိနေခြင်းဖြစ်သည့်အတွက် စားကျက်မြေပယ်ဖျက်ခွင့် ရရှိရေးအတွက် လုပ်ထုံးလုပ်နည်းများနှင့်အညီ လျှောက်ထားတင်ပြရန် လိုအပ်ပါကြောင်း၊ လုပ်ထုံးလုပ်နည်းများသည် စားကျက်မြေပယ်ဖျက်ရေး လျှောက်ထား တင်ပြလာပါကအမြန်ဆုံး ကျေးရွာများဖွဲ့စည်းခွင့် တရားဝင်ရရှိရေးအတွက်ကို ဆောင်ရွက်ပေးသွားမည် ဖြစ်ပါကြောင်း ရှင်းလင်းဖြေကြားပါသည်။