(ဃ)-ကျင်းဒွေး၊ မှန်တောင်၊ လဲပုံ၊ မကြားအိမ်နူး၊ လုံအိမ်နူး၊ ငွန်းဇိုင်ကျေးရွာ အုပ်စုများအတွက် ဖုန်းဆက်သွယ်ရေးနှင့် အင်တာနက်ချိတ်ဆက် အသုံးပြုနိုင်မယ့် ဆက်သွယ်ရေးတာဝါတိုင်များ တည်ဆောက်ပေးရန် အစီအစဉ်ရှိ/မရှိနှင့် စပ်လျဉ်း သည့်မေးခွန်း

ပို့ဆောင်ရေးနှင့် ဆက်သွယ်ရေး ဝန်ကြီးဌာန၊ မြန်မာ့ဆက်သွယ်ရေး လုပ်ငန်းအနေနှင့် ချင်းပြည်နယ်၊ ကန်ပက်လက်မြို့ပေါ်တွင် CDMA 450 MHz စခန်းတစ်ခုနှင့် GSM စခန်းတစ်ခု ဖွင့်လှစ်ထားရှိပြီး မိုဘိုင်းဆက်သွယ်ရေး ဝန်ဆောင်မှုလုပ်ငန်းများ ဆောင်ရွက်ပေးလျက် ရှိပါကြောင်း၊ တယ်လီနောမြန်မာ လီမိတက်အနေဖြင့် ကန်ပက်လက်မြို့နယ်အတွင်းရှိ နတ်မတောင်အမျိုးသား ဥယာဉ်တွင် GSM စခန်းတစ်ခု၊ ဗိုလ်ချုပ်လမ်း၊ အမှတ် (၁) ရပ်ကွက်တွင် GSM စခန်းတစ်ခုနှင့် အေးစခန်း ကျေးရွာတွင် GSM စခန်းတစ်ခု စုစုပေါင်း GSM စခန်း သုံးခုကို ဖွင့်လှစ်ထားရှိပြီး ဝန်ဆောင်မှုများ ဆောင်ရွက်ပေးလျက် ရှိပါကြောင်း၊ အော်ရီဒူးမြန်မာလီမိတက် အနေဖြင့်လည်း ချင်းပြည်နယ်၊ ကန်ပက်လက်မြို့ မြို့ပတ်လမ်းအပေါ်တွင် GSM စခန်းတစ်ခု၊ နတ်မတောင် အမျိုးသားဥယာဉ်တွင် GSM စခန်းတစ်ခု စုစုပေါင်း GSM စခန်း နှစ်ခုကို ဖွင့်လှစ်ပြီး ဝန်ဆောင်မှုများ ဆောင်ရွက်ပေးလျက် ရှိပါကြောင်း၊ ထို့အတူ Telecom International Myanmar (MyTel) အနေ ဖြင့်လည်း ကန်ပက်လက်မြို့၊ မြို့ပတ်လမ်းအမှတ် (၂) ရပ်ကွက်တွင် GSM စခန်းတစ်ခုကို ဖွင့်လှစ်ထားရှိပြီး ဝန်ဆောင်မှုများပေးလျက်ရှိပါကြောင်း၊

ချင်းပြည်နယ်၊ ကန်ပက်လက်မြို့နယ်အတွင်း MPT ၊ Telenor ၊ Ooredoo နှင့် Mytel တို့မှ ဆက်သွယ် ရေးဝန်ဆောင်မှု လုပ်ငန်းများ ဆောင်ရွက်ပေးလျက်ရှိသော CDMA 450 MHz စခန်းတစ်ခုနှင့် GSM စခန်းခုနစ်ခုတို့ ရှိပါကြောင်း၊ ပြည်တွင်း/ပြည်ပဆက်သွယ်ရေး အော်ပရေတာများအနေဖြင့် နိုင်ငံတစ်ဝန်းလုံးရှိ မြို့ပြနှင့်ကျေးလက် ဒေသများပါမကျန် ဆက်သွယ်ရေးကဏ္ဍ ပိုမိုဖွံ့ဖြိုးတိုးတက် ကောင်းမွန်စေရန်အတွက် မိုဘိုင်းဆက်သွယ်ရေး စခန်းများကို တိုးချဲ့တည်ဆောက်ပေးလျက်ရှိ သော်လည်း မိုဘိုင်းစခန်းများ တည်ဆောက်ရာတွင် ရင်းနှီးမြုပ်နှံမှုကုန်ကျစရိတ်၊ အဝေးဆက်သွယ်ရေး ဆက်ကြောင်း (မိုက္ကရိုဝေ့/ဖိုင်ဘာ/ဂြိုဟ်တု) စသည်များ တည်ဆောက်ရခြင်း၊ လျှပ်စစ်မီးရရှိနိုင်မှု အခြေအနေ၊ မြေပြင်အနေအထား၊ ရာသီဥတုအခြေအနေ၊ နယ်မြေဒေသ တည်ငြိမ်အေးချမ်းမှု အခြေအနေစသည်တို့အပေါ် မူတည်ပြီး တည်ဆောက်ရခြင်း ဖြစ်ပါကြောင်း၊

သို့ဖြစ်ပါ၍ မိုဘိုင်းဆက်သွယ်ရေးစခန်းတည်ဆောက်ပေးရန် လွှတ်တော်ကိုယ်စားလှယ်ကြီး တောင်းဆိုထားသော ကန်ပက်လက်မြို့နယ်အတွင်း ကျင်းဒွေး၊ မှန်တောင်၊ လဲပုံ၊ မကြားအိမ်နူး၊ လုံအိမ်နူး၊ ငွန်းဇိုင်ကျေးရွာအုပ်စုများမှာ လျှပ်စစ်မီးမရရှိနိုင်ခြင်း၊ သွားလာရန်ခက်ခဲခြင်း၊ တောတောင် ထူထပ်ခြင်း၊ အဝေးဆက်သွယ်ရေးစခန်း ဆက်ကြောင်းတည်ဆောက်ရန် ခက်ခဲခြင်းတို့ကြောင့်  ဆက်သွယ်ရေး အော်ပရေတာများအနေဖြင့် ကန်ပက်လက်မြို့နယ်အတွင်း အဆိုပါ ကျေးရွာအုပ်စုများတွင် မိုဘိုင်းဆက်သွယ်ရေးစခန်းများ တည်ဆောက်ပေးရန် လောလောဆယ် အစီအစဉ် မရှိသေးပါကြောင်း သိရှိရပါသည်။ သို့ရာတွင် ပို့ဆောင်ရေးနှင့်ဆက်သွယ် ရေးဝန်ကြီးဌာန၊ ဆက်သွယ်ရေးညွှန်ကြားမှု ဦးစီးဌာနအနေဖြင့် ဆက်သွယ်ရေး အော်ပရေတာများမှ အချိုးကျ ထည်‌့ဝင်သည့် အခြေခံဆက်သွယ်ရေး လိုအပ်ချက်ဖြည့်ဆည်းရေး ဆိုင်ရာရန်ပုံငွေ (Universal Service Fund-USF) ၏ စည်းမျဉ်းစည်းကမ်း သတ်မှတ်ချက်များနှင့်အညီ ပထမအဆင့်အနေဖြင့် မြို့နယ် ၁၉ မြို့နယ်တွင် မိုဘိုင်းဆက်သွယ်ရေးစခန်းများ တည်ဆောက်ပေးနိုင်ရေးအတွက် ၂၀၁၉ ခုနှစ် ပထမသုံးလပတ်အတွင်း တင်ဒါခေါ်ယူပြီး လုပ်ငန်းများဆက်လက် ဆောင်ရွက်သွားမည်ဖြစ်ရာ ဆက်သွယ်ရေးကွန်ရက် အပြည်‌့အဝလွှမ်းခြုံမှု မရရှိသေးသည့် ချင်းပြည်နယ်၊ ကန်ပက်လက် မြို့နယ်ပါဝင်ပြီး ကန်ပက်လက်မြို့နယ်အတွင်း မိုဘိုင်းဆက်သွယ်ရေးစခန်း ကိုးခုတည်ဆောက်ပေးရန် စီစဉ်လျာထားပါကြောင်း ရှင်းလင်းဖြေကြားပါသည်။