(င)-တရားရုံးများတွင် အမှုပွဲစားများပပျောက်ရေးကို မည်ကဲ့သို့ စီမံဆောင်ရွက်နေသည်ကို သိလိုခြင်းနှင့် စပ်လျဉ်းသည်‌့မေးခွန်း

ရှေ့နေလိုက်ပါသူများ အက်ဥပဒေ (Legal Practitioners Act) ပုဒ်မ ၃ တွင် အမှုပွဲစား (Tout) ဆိုသည်မှာ (က) ရှေ့နေတစ်ဦးဦးထံမှ အခကြေးငွေ၊ အဖိုးစားနား ရရှိရန် ရှေ့နေ၏ တရားဥပဒေရေးရာ လုပ်ငန်းအတွက် အမှုရှာပေးသူ သို့တည်းမဟုတ် အခြားပုဂ္ဂိုလ်တစ်ဦးထံမှ အခကြေးငွေ၊ အဖိုးစားနားရယူ၍ အမှုရှာပေးရန်ရှေ့နေကိုဖြစ်စေ၊ ရှေ့နေလုပ်ငန်း အတွက် အမှုရရှိရန် စိတ်ဝင်စားသူကိုဖြစ်စေ ကမ်းလှမ်းအဆိုပြုသူ၊ သို့တည်းမဟုတ်။ (ခ) တရားမ သို့မဟုတ် ရာဇဝတ်တရားရုံး အနီးအနားတွင်ဖြစ်စေ၊ အခွန်ရုံးအနီးအနားတွင်ဖြစ်စေ အမှုရရှိရေးအတွက် မကြာခဏ လှုပ်ရှားသွားလာနေခြင်း၊ ဘူတာရုံ၊ သ‌င်္ဘောဆိပ်၊ တည်းခိုခန်းနှင့် အများပြည်သူ အပန်းဖြေသည့် နေရာများတွင် အမှုရရှိရေးအတွက် မကြာခဏသွားလာနေခြင်း ပြုသူတို့ကိုဆိုလိုကြောင်း အဓိပ္ပာယ်ဖွင့်ဆိုထားပါကြောင်း၊ အဆိုပါပြဋ္ဌာန်းချက်အရ အမှုပွဲစားများသည် အမှုရရှိအောင် ဆောင်ရွက်သူ၊ အမှုရှာသူများဖြစ်ပြီး ၎င်းတို့သည် တရားရုံးပတ်ဝန်းကျင်တွင်သာမက လူအများ သွားလာသည့် နေရာတိုင်းတွင် လှုပ်ရှားသွားလာလေ့ရှိကြောင်း အနက်အဓိပ္ပာယ်ဖွင့်ဆိုထားခြင်း ဖြစ်ပါကြောင်း၊

တရားရုံးများတွင် အမှုပွဲစားများအဖြစ် ဆောင်ရွက်နေသူများသည် တရားရုံးအသီးသီးသို့ တရားစွဲတင်ပို့လာကြသော ရာဇဝတ်ကြောင်းဆိုင်ရာအမှုများ၊ တရားမကြောင်းအရ စွဲဆိုသောအမှုများတွင် အမှုအစအဆုံး အဆင်ပြေစွာဆောင်ရွက်ပေးရေးနှင့် အမှုအနိုင်ရရှိရေးအတွက် တရားသူကြီးနှင့် နီးစပ်မှု ရယူပြီး ၎င်းတို့ပွဲစားအဖြစ် ဆောင်ရွက်နေသည့်အမှုများကို တရားရုံးက ဦးစားပေးဆောင်ရွက်စေခြင်း၊ အနိုင်ရအောင် ဆောင်ရွက်ပေးစေခြင်း၊ ရှုံးနိမ့်ခြေရှိလာလျှင် နည်းမျိုးစုံဖြင့် အမှုကြန့်ကြာအောင် ဆောင်ရွက်ခြင်း၊ မမှန်မကန်တိုင်ကြားစေခြင်း စသည့် နည်းလမ်းများသုံးပြီး ဆောင်ရွက်နေကြ ကြောင်းလည်း သိရှိရပါကြောင်း၊ ထိုသို့ အမှုပွဲစားများက မမှန်မကန်ဆောင်ရွက်မှုများတွင် တရားသူကြီးများနှင့် တရားရုံးဝန်ထမ်းများသည် ပူးပေါင်းပါဝင်မှု၊ အားပေးကူညီမှု လုံးဝမရှိစေရန်အတွက် ပြည်ထောင်စုတရားလွှတ်တော်ချုပ်က တိုင်းဒေသကြီး/ပြည်နယ် တရားလွှတ်တော်နှင့် ခရိုင်/မြို့နယ် တရားရုံးအားလုံးသို့ ၂၆-၂-၂၀၀၄ ရက်စွဲပါစာအမှတ်၊ ၁၀၁၃/စု-၁၂/၅၂/၂၀၀၄ ဖြင့် သတိပေးထားပြီးဖြစ်ပါကြောင်း၊

ထို့အပြင် အမှုပွဲစားများအား ဖော်ထုတ်အရေးယူရန်ကိစ္စကိုလည်း အများပြည်သူသိရှိစေရန် ကြေညာချက် ထုတ်ပြန်၍ တရားရုံးတိုင်းရှိ ကြော်ငြာသင်ပုန်းတွင် မြင်သာထင်သာအောင် ကပ်ထားရန်၊ ထိုကြေညာချက်အရ မမှန်မကန်လုပ်ဆောင်မှုမျိုး ဖော်ထုတ်တွေ့ရှိလျှင် တရားသူကြီးများက ထိုသူကို ထိရောက်စွာ အရေးယူရန် ပြည်ထောင်စုတရားလွှတ်တော်ချုပ် အနေဖြင့် ၂၆-၂-၂၀၁၄ ရက်စွဲပါစာတွင် ထပ်မံညွှန်ကြားထားပြီးဖြစ်ပါကြောင်း၊ ထို့အတူ တရားရုံးအသီးသီးတွင် လိုက်ပါဆောင်ရွက်နေသည့် ရှေ့နေများအနက် နယ်စားရှေ့နေဟုဆိုသည့် ရှေ့နေအချို့ တရားရုံးအရာထမ်း၊ အမှုထမ်းများနှင့် နီးစပ်မှုရယူပြီး ၎င်းတို့လိုက်ပါဆောင်ရွက်နေသည့် အမှုများကို တရားရုံးက ဦးစားပေး ဆောင်ရွက်စေခြင်း၊ အနိုင်ရရှိအောင် ဆောင်ရွက်စေခြင်း၊ ရှုံးနိမ့်ခြေရှိလာလျှင် နည်းမျိုးစုံဖြင့် အချိန်ဆွဲနေခြင်းစသည်တို့ကို ပြုလုပ်ခြင်းဖြင့် တစ်ဖက်အမှုသည်ကို စိတ်ဓာတ်ကျဆင်းအောင် ဆောင်ရွက်မှုများ ရှိနေကြောင်းဖြင့် စွပ်စွဲတိုင်ကြားမှုများရှိခဲ့သဖြင့် တရားရုံးအဆင့်ဆင့်တွင် တာဝန်ထမ်းဆောင် နေကြသူများသည် ရိုးသားတည်ကြည်စွာ ဆောင်ရွက်နေကြသော တရားသူကြီးများ၊ တရားရုံးဝန်ထမ်းများ၏ ဂုဏ်သိက္ခာကို ထိခိုက်နစ်နာစေသော မမှန်မကန်လုပ်ဆောင်မှုမျိုး မပြုလုပ်မိကြစေရန်၊ မိမိတို့ကိုယ်တိုင် မည်သည်‌့ရှေ့နေကိုငှားပါဟူ၍ လမ်းညွှန်မှုမပြုရန် ပြည်ထောင်စုတရားလွှတ်တော်ချုပ်က ၂၁-၅-၁၉၉၂ ရက်စွဲပါ ညွှန်ကြားချက်အမှတ်(၁/၁၉၉၂) ကို ထုတ်ပြန်ပြီး သတိပေးအကြောင်းကြားခဲ့ပြီး ဖြစ်ပါကြောင်း၊ ထိုညွှန်ကြားချက်ကို တရားရုံးတိုင်းရှိ ကြော်ငြာသင်ပုန်းတွင် အများပြည်သူသိရှိအောင် ကပ်ထားရန်လည်း ညွှန်ကြားခဲ့ပြီး ဖြစ်ပါကြောင်း၊

တရားရုံးများတွင် အမှုပွဲစားများ ကျက်စားလေ့ရှိခြင်းကြောင့် တရားစီရင်ရေးမဏ္ဍိုင် တိမ်းစောင်းမှု မရှိစေရန်အလို့ငှာ ၎င်းတို့၏ မမှန်ကန်သောလုပ်ရပ်များကို ဖော်ထုတ်အရေးယူရန် လိုအပ်လျက်ရှိပါကြောင်း၊ သို့ဖြစ်ပါ၍ တရားရုံးများတွင် ကျင်လည်ကျက်စားနေသော အမှုပွဲစားများ၊ နယ်စားရှေ့နေများကိစ္စ ဖော်ထုတ်အရေးယူရန် ပြည်ထောင်စု တရားလွှတ်တော်ချုပ်သည် ယခင်ကတည်းက ညွှန်ကြားချက်၊ ကြေညာချက်များ ထုတ်ပြန်ထားပြီးဖြစ်ပါကြောင်း နှင့် အကြောင်းအမျိုးမျိုးဖြင့် တရားရုံးကို ဆက်နွှယ်ရောက်ရှိ လာကြသူကလည်း အမှုပွဲစား၊ နယ်စားရှေ့နေဆိုသူများနှင့် စပ်လျဉ်း၍ တရားရုံးသို့ ဖော်ထုတ်တင်ပြ တိုင်ကြားနိုင်ကြပါကြောင်း၊ တရားရုံးမှ လက်ခံကျေနပ်ဖွယ်ရာ သက်သေထင်ရှားရှိကြောင်း စုံစမ်းတွေ့ရှိပါက အဆိုပါသူ၏အမည်ကို အမှုပွဲစားအမည်စာရင်း ထည်‌့သွင်းခြင်း၊ ထုတ်ပြန်ကြေညာခြင်းနှင့် ဥပ‌ဒေအရ အရေးယူခြင်းများကို ပြုလုပ်နိုင်ပြီဖြစ်ပါကြောင်း ရှင်းလင်းဖြေကြားပါသည်။